નિજધામ આશ્રમ, રામનગર, સુરત ખાતે શ્રીમદ ભાગવત કથા સપ્તાહનો ભવ્ય પ્રારંભ
સુરત શહેરના રામનગર સિંધી કોલોનીમાં આવેલા નિજધામ જયબાબા આશ્રમમાં સદગુરૂ બાબા રામદાસ સાહેબના ૧૫૧મા જન્મોત્સવ તથા મહાશિવરાત્રિના પવિત્ર પાવન અવસરને અનુલક્ષીને શ્રીમદ ભાગવત કથા સપ્તાહનું ભવ્ય તથા ભાવભર્યું આયોજન કરવામાં આવ્યું છે. આ સમગ્ર કાર્યક્રમ ધાર્મિક ઉલ્લાસ, ભક્તિભાવ અને આધ્યાત્મિક ઉર્જાથી ભરપૂર વાતાવરણમાં યોજાઈ રહ્યો છે.
આશ્રમના સેવાધારી પવન હાસીજા દ્વારા આપવામાં આવેલી માહિતી અનુસાર, કથા સપ્તાહના પ્રથમ દિવસે ભવ્ય કલશ યાત્રાનું આયોજન કરવામાં આવ્યું હતું. આ યાત્રામાં મોટી સંખ્યામાં શ્રદ્ધાળુ ભાઈ-બહેનોએ ઉત્સાહપૂર્વક ભાગ લીધો હતો. ભજન-કીર્તન, જયઘોષ અને ભક્તિમય વાતાવરણ સાથે યાત્રા આશ્રમ પરિસરમાં પહોંચી હતી, જેણે સમગ્ર વિસ્તારમાં આધ્યાત્મિક ઉર્જાનો સંચાર કર્યો હતો.
કથા વાચન માટે વૃંદાવનથી વિશેષ આમંત્રણ પર પધારેલા પ્રસિદ્ધ કથાવાચક બૃજેશ ગોસ્વામી મહારાજ દ્વારા શ્રીમદ ભાગવત કથાનું અત્યંત ભાવપૂર્ણ, રસમય અને હૃદયસ્પર્શી વર્ણન કરવામાં આવી રહ્યું છે. તેમના વાણીમાંથી નીકળતા ભગવાનના લીલા-ચરિત્રો અને ઉપદેશોએ શ્રદ્ધાળુઓમાં ભક્તિની લાગણી તીવ્ર કરી છે અને આધ્યાત્મિક જ્ઞાનનો પ્રકાશ પાથર્યો છે.
આ પવિત્ર અવસર પર સદગુરૂ સ્વામી વિશનદાસ મહારાજની મૂર્તિની પ્રાણ પ્રતિષ્ઠા વિધિ વૈદિક મંત્રોચ્ચાર, પૂજા-અર્ચના સાથે સંપન્ન કરવામાં આવી હતી. સાથે જ અખંડ પાઠ સાહેબનો શુભારંભ કરવામાં આવ્યો હતો. કાર્યક્રમ દરમિયાન ભોગ બાદ ઉપસ્થિત હજારો શ્રદ્ધાળુઓને ભંડારા રૂપે પ્રસાદી ભોજનનું વિતરણ કરવામાં આવ્યું, જેમાં સૌએ ભાગ લીધો અને આનંદ અનુભવ્યો.
કાર્યક્રમમાં આશ્રમના ટ્રસ્ટી ભાઈસાહેબ રૂપચંદ રોહેડા અને ભાઈસાહેબ લક્ષ્મીચંદ જુગલાણી ઉપસ્થિત રહ્યા હતા. બંને ટ્રસ્ટીઓએ શ્રદ્ધાળુઓને આશીર્વાદ આપ્યા અને સમગ્ર કથા સપ્તાહનો પૂર્ણ લાભ લેવા તથા ભક્તિભાવથી જોડાવા અનુરોધ કર્યો હતો.
આ સમગ્ર આયોજનમાં ભક્તો તરફથી અભૂતપૂર્વ ઉત્સાહ અને પ્રતિસાદ જોવા મળી રહ્યો છે. આગામી દિવસોમાં પણ વિવિધ ધાર્મિક કાર્યક્રમો, ભજન-કીર્તન, પ્રવચન અને આધ્યાત્મિક પ્રવૃત્તિઓ યોજાશે, જેમાં સૌ શ્રદ્ધાળુઓને આમંત્રિત કરવામાં આવે છે.
રીપોર્ટ: વિશાલ પટેલ