*પાવાગઢમાં ગુડ્સ રોપ-વે દુર્ઘટના: 6 લોકોના મૃત્યુ*
પાવાગઢ, પંચમહાલ – આજે પાવાગઢ ખાતે એક અત્યંત દુઃખદ ઘટનામાં ગુડ્સ રોપ-વેનો કૅબલ તૂટી જતાં થયેલી દુર્ઘટનામાં છ લોકોના કરુણ મૃત્યુ થયા છે. આ ઘટના ગુડ્સ રોપ-વે પર નિર્માણ સામગ્રી લઈને જતી ટ્રૉલીનો કૅબલ તૂટી જવાથી બની હતી, જેના પરિણામે કૅબિન નીચે પટકાઈ હતી.પ્રાપ્ત માહિતી અનુસાર, મૃતકોમાં શ્રમિકો અને લિફ્ટ ઑપરેટરનો સમાવેશ થાય છે. આ દુર્ઘટના શ્રદ્ધાળુઓ માટેના રોપ-વેથી અલગ એવા ગુડ્સ રોપ-વે પર થઈ હતી. દુર્ઘટના બાદ સાવચેતીના ભાગરૂપે યાત્રાળુઓ માટેનો મુખ્ય રોપ-વે પણ આગામી સૂચના ન મળે ત્યાં સુધી બંધ કરી દેવામાં આવ્યો છે.પંચમહાલ જિલ્લાના ડીએસપી (ડિસ્ટ્રિક્ટ સુપરિન્ટેન્ડન્ટ ઑફ પોલીસ) ડૉ. હરેશ દુધાતે આ દુર્ઘટનાની પુષ્ટિ કરી છે. આ ઘટના અંગે વધુ તપાસ ચાલી રહી છે. સ્થાનિક પ્રશાસન અને પોલીસ દ્વારા રાહત અને બચાવ કામગીરી હાથ ધરવામાં આવી છે. આ દુઃખદ ઘટના અંગે ઊંડાણપૂર્વક તપાસ કરીને જવાબદારો સામે કડક કાર્યવાહી કરવામાં આવશે.અધિકારીઓ દ્વારા મૃતકોના પરિવારોને યોગ્ય મદદ અને સહાય પૂરી પાડવામાં આવશે. આ દુર્ઘટનાથી સમગ્ર વિસ્તારમાં શોકની લાગણી છવાઈ ગઈ છે.
રિપોર્ટ વિશાલ પટેલ 9377424645