📰 પ્રધાનમંત્રી આવાસ યોજના – બે જ વર્ષમાં ખખડધજ!

📰 પ્રધાનમંત્રી આવાસ યોજના – બે જ વર્ષમાં ખખડધજ!

સુરત શહેરના વેશુ ગામના રૂઢ ખાતે, રાહુલ રાજ મોલ પાછળ ઉભા કરાયેલા પ્રધાનમંત્રી આવાસ આજે સામાન્ય અને મધ્યમ વર્ગના લોકો માટે આશીર્વાદ નહીં પરંતુ અભિશાપ સાબિત થઈ રહ્યા છે. અંદાજે ₹૫૦ કરોડના ખર્ચે ઉભા કરાયેલા ૧૩ માળના આ આવાસો, માત્ર બે વર્ષમાં જ પાણી લીકેજ, ભેજ અને સ્ટ્રકચરલ નુકસાનના કારણે ખંડેર જેવું રૂપ ધારણ કરી રહ્યા છે.

વરસાદે ઉઘાડ્યું કૌભાંડ

વરસાદી પાણી લીકેજને કારણે દિવાલો પચી ગયા છે, ફ્લેટોના રંગ ઉખડી ગયા છે, પોપડા ઊખડી પડ્યા છે અને સૌથી ચિંતાજનક વાત – બીમ અને કોલમ સુધીને ગંભીર નુકસાન થવા લાગ્યું છે. જો સમયસર પગલાં નહીં લેવાય તો બિલ્ડિંગની સ્ટ્રક્ચરલ સ્ટેબીલીટી જોખમાય એવી ભીતિ રહી છે.

ભ્રષ્ટાચારના આક્ષેપો – હલકી ગુણવત્તાનો માલ

રહેવાસીઓનો સીધો આક્ષેપ છે કે, બિલ્ડરો અને કોન્ટ્રાક્ટરો દ્વારા ભ્રષ્ટાચાર કરી હલકી ગુણવત્તાનો માલસામાન વપરાયો. “લોકો સાથે ખુલ્લેઆમ છેતરપિંડી થઈ છે,” એમ રહીશોનો આક્ષેપ છે.

જાહેર રજૂઆત છતાં ઠંડો વલણ

સુરત મહાનગર પાલિકાના કમિશનર, અઠવા ઝોન અધિકારીઓ અને એફોર્ડેબલ હાઉસિંગ વિભાગ પાસે અનેક વાર રજૂઆતો કરવામાં આવી છે, પરંતુ આજ સુધી એકેય પગલું લેવામાં આવ્યું નથી. લોકો કહે છે કે, સરકારની ગરીબોને ઘર આપવા માટેની યોજના “કાગળ પર તો સફળ છે, પરંતુ હકીકતમાં ભ્રષ્ટાચારના કાદવમાં દટાઈ ગઈ છે.”

લોકોની વેદના – એક એક પાઈ ભેગી કરી લીધેલા સપના તૂટી ગયા

રહેવાસીઓની આંખોમાં આંસુ સાથેની પીડા સ્પષ્ટ દેખાય છે:
👉 “સામાન્ય માણસે વર્ષો સુધી બચત કરી એક પાઈ ભેગી કરી, ઘરનું સ્વપ્ન પૂરું કર્યું, પરંતુ હવે ઘર રહેવા લાયક જ નથી રહ્યું.”
👉 “વરસાદમાં પાણી ટપકે છે, ભેજ વધી મચ્છર-માખી ઉપદ્રવ થાય છે, બાળકોને તાવ, ડેન્ગ્યુ જેવા રોગ ફેલાઈ રહ્યા છે.”

તાત્કાલિક કાર્યવાહી ન થાય તો મોટી દુર્ઘટના?

વિશેષજ્ઞોના મતે, જો આવી જ સ્થિતિ રહી તો આગામી કેટલાક વર્ષોમાં બિલ્ડિંગની સંપૂર્ણ સ્ટ્રક્ચરલ સલામતી ખતરામાં મુકાઈ શકે છે. આ અવસ્થામાં રહીશોની જાનહાનિ થવાની પૂરી શક્યતા છે.

🔴 જવાબદારો કોણ?

સુરત મહાનગર પાલિકાનો એફોર્ડેબલ હાઉસિંગ વિભાગ

અઠવા ઝોનના અધિકારીઓ

નિર્માણ કામગીરી કરનાર બિલ્ડરો અને કોન્ટ્રાક્ટરો

લોકોનો પ્રશ્ન છે – શું હવે કોઈ જવાબદારી નક્કી થશે કે ફરી એક વખત ગરીબ અને મધ્યમ વર્ગના લોકોની મહેનતનો ઘાસ ચરાઈ જશે?

✍️ આવાસ યોજના – ગરીબોના સપના તોડી નાખતી યોજના નહીં પરંતુ જીવન બદલતી યોજના બનવી જોઈએ. આજે નહીં તો કાલે, સરકાર અને જવાબદાર અધિકારીઓએ આ દુર્દશા સામે તાત્કાલિક પગલાં લેવાના જ રહેશે.