સ્વામી ટેઉંરામ આશ્રમ, રામનગર, સુરત ખાતે ભવ્ય શ્રીમદ્ ભાગવત કથા સપ્તાહનું સફળ આયોજનભક્તોમાં ભારે ઉત્સાહ અને ભક્તિમય વાતાવરણનો સંચાર

સુરત શહેરના રામનગર સિન્ધી કોલોનીમાં આવેલ પવિત્ર સ્વામી ટેઉંરામ આશ્રમ ખાતે ભક્તિ અને આધ્યાત્મિકતાના અનોખા માહોલ વચ્ચે શ્રીમદ્ ભાગવત મહાપુરાણ કથા સપ્તાહનું ભવ્ય આયોજન કરવામાં આવ્યું હતું. આ સપ્તાહ દરમિયાન આશ્રમ પરિસરમાં ભક્તિમય વાતાવરણ છવાયેલું રહ્યું અને હજારો શ્રદ્ધાળુ ભક્તો દૂર-દૂરથી આવીને ધર્મલાભ મેળવ્યો.

આશ્રમના સેવાધારી શ્રી પવન હાસીજાએ આપેલી માહિતી અનુસાર, મહારાષ્ટ્રના નાગપુર શહેરથી વિશેષ આમંત્રણ પર પધારેલા વિખ્યાત કથાવાચક સંત શ્રી દામોદર દાસજી મહારાજએ સાત દિવસ સુધી શ્રીમદ્ ભાગવત કથાનું સરળ, સુંદર અને ભાવપૂર્ણ વાચન કર્યું. તેમના મધુર વાણી દ્વારા ભગવાન શ્રી કૃષ્ણની લીલાઓ, ભક્તિનું અનન્ય મહત્વ, સદાચારના માર્ગ અને જીવનના ઉચ્ચ આદર્શોનું વિસ્તૃત વર્ણન કરવામાં આવ્યું, જેણે શ્રોતાઓને ભાવવિભોર કરી દીધા.

સમગ્ર સપ્તાહ દરમિયાન સવારે તેમજ સાંજે મોટી સંખ્યામાં ભક્તો ઉપસ્થિત રહ્યા. ભજન-કીર્તનના મધુર સ્વરો સાથે કથાનો રસાસ્વાદ લેવામાં આવ્યો, જેથી આશ્રમ પરિસરમાં ભક્તિ, શ્રદ્ધા અને શાંતિનો અદ્ભુત માહોલ સર્જાયો.

કથા સપ્તાહના સમાપન દિવસે સિન્ધી સમાજના પરમ પૂજ્ય સંત સ્વામી રામપ્રકાશજી મહારાજ વિશેષ ઉપસ્થિતિ આપી આશ્રમ ખાતે પધાર્યા હતા. તેમણે ભક્તોને આશીર્વાદ આપ્યા તેમજ ધાર્મિક અને સાત્વિક જીવન જીવવાની પ્રેરણા આપી. આ પ્રસંગે વિશેષ પૂજા-અર્ચના, આરતી અને ભક્તિમય કાર્યક્રમોનું આયોજન કરવામાં આવ્યું હતું.

સપ્તાહ દરમિયાન દરરોજ ભક્તો માટે હાથપ્રસાદી તથા ભંડારા ભોજન પ્રસાદીનું વ્યવસ્થિત આયોજન કરવામાં આવ્યું હતું, જેમાં હજારો લોકોએ ભાવપૂર્વક પ્રસાદ ગ્રહણ કર્યો.

આ સમગ્ર ભવ્ય કાર્યક્રમને સફળ બનાવવા માટે આશ્રમના સેવાધારીઓ, સ્વયંસેવકો અને શ્રદ્ધાળુ ભક્તો દ્વારા ઉત્તમ વ્યવસ્થા અને સેવાભાવથી કાર્ય કરવામાં આવ્યું હતું.

આ કથા સપ્તાહ દ્વારા ભક્તોમાં આધ્યાત્મિક જાગૃતિ અને ભગવાન પ્રત્યેની ભક્તિ વધુ ગાઢ બની છે.

રિપોર્ટર: વિશાલ પટેલ