🏏 *વર્લ્ડ કપ વિજેતા ભારતીય મહિલા ક્રિકેટ ટીમ વડાપ્રધાન મોદીની મુલાકાતે*

દિલ્હી, 5 નવેમ્બર 2025

આઈસીસી મહિલા વર્લ્ડ કપ 2025માં ઐતિહાસિક વિજય મેળવ્યા બાદ ભારતીય મહિલા ક્રિકેટ ટીમ બુધવારે વડાપ્રધાન નરેન્દ્ર મોદીની મુલાકાતે પહોંચી હતી. ટીમની કેપ્ટન હરમનપ્રીત કૌર અને વાઈસ કેપ્ટન સ્મૃતિ મંધાનાના નેતૃત્વમાં ખેલાડીઓએ વડાપ્રધાનને ટ્રોફી સાથે મુલાકાત કરી અને તેમની શુભેચ્છા સ્વીકારી.

ભારતીય મહિલા ટીમે ગત રવિવારે દક્ષિણ આફ્રિકાને 52 રનથી પરાજિત કરી ભારત માટે પ્રથમવાર મહિલા વર્લ્ડ કપ જીત્યો હતો. આ ઐતિહાસિક વિજયથી સમગ્ર દેશ ગૌરવ અનુભવી રહ્યો છે.

વડાપ્રધાન મોદીએ ખેલાડીઓને વ્યક્તિગત રીતે અભિનંદન પાઠવતા કહ્યું કે,

“ભારતીય મહિલા ક્રિકેટ ટીમે રમતના મેદાનમાં જ નહીં, પરંતુ દેશની દરેક દીકરીને નવી પ્રેરણા આપી છે. આ વિજય નવા ભારતની શક્તિ અને અડગ સંકલ્પનું પ્રતિક છે.”

મુલાકાત દરમિયાન વડાપ્રધાને દરેક ખેલાડી સાથે હળવી વાતચીત કરી અને ટીમના ઉત્તમ પ્રદર્શનની પ્રશંસા કરી. તેમણે જણાવ્યું કે આ સિદ્ધિ દેશની યુવતીઓમાં આત્મવિશ્વાસ વધારશે અને તેમને રમતગમત ક્ષેત્રે આગળ વધવા પ્રોત્સાહિત કરશે.

હરમનપ્રીત કૌરની લાગણી

કેપ્ટન હરમનપ્રીત કૌરે જણાવ્યું —

“2017માં પણ અમે વડાપ્રધાનજીને મળ્યા હતા, પણ તે વખતે અમે ટ્રોફી વિના ગયા હતા. આજે ટ્રોફી સાથે આવવાનો આનંદ અમારે માટે અવિસ્મરણીય છે. આશા છે કે આવનારા વર્ષોમાં પણ ભારત માટે આવી ખુશીના ક્ષણો સર્જી શકીશું.”

સ્મૃતિ મંધાનાની પ્રતિક્રિયા

વાઈસ કૅપ્ટન સ્મૃતિ મંધાનાએ જણાવ્યું —

“વડાપ્રધાન હંમેશા ટીમને પ્રોત્સાહિત કરે છે. તેમની ઉર્જા અને વિશ્વાસ દરેક ખેલાડીમાં નવી દિશા આપે છે. દેશની દીકરીઓ આજે દરેક ક્ષેત્રમાં આગળ વધી રહી છે અને વડાપ્રધાનના પ્રોત્સાહનથી એ શક્ય બન્યું છે.”

વિશેષ ભેટ — “NaMo” ટી-શર્ટ પર ટીમના હસ્તાક્ષર

મુલાકાત દરમિયાન ભારતીય મહિલા ટીમે વડાપ્રધાનને એક વિશેષ સ્મૃતિચિન્હ તરીકે ટી-શર્ટ ભેટ આપી, જેમાં “NaMo” લખેલું હતું અને બધા ખેલાડીઓના હસ્તાક્ષર હતા. આ ટી-શર્ટ ટીમની એકતા, સન્માન અને વડાપ્રધાન પ્રત્યેના સ્નેહનું પ્રતિક બની.

વડાપ્રધાને ખુશી વ્યક્ત કરતા કહ્યું કે ટીમનો આ પ્રેમ અને ભાવના અનમોલ છે. ત્યારબાદ વડાપ્રધાને ખેલાડીઓ સાથે જૂથ તસવીર પડાવી, જે સોશિયલ મીડિયામાં વાયરલ થઈ ગઈ છે.

મુલાકાત પછી ચેમ્પિયન ટીમ તાળીઓના ગડગડાટ અને વધામણીઓ વચ્ચે પોતાની હોટલ પરત ફરી હતી.

રીપોર્ટ વિશાલ પટેલ 9377424645